Kartfesta miljøinformasjon, til dømes oversyn over verna område og friluftsområde, saman med lokalkunnskap, er viktig for å ha ein god beredskap mot akutt forureining.
Det er sett i gong tiltak på fleire nedlagde fyllplassar i Hordaland. Eit døme er Slettebakken i Bergen, der det vart fjerna massar i samband med bygging av Bybanen.
Det er alt lagt ned store ressursar i opprydning av forureina fjordområde. Både rundt Haakonsvern og inst i Sørfjorden er det sett inn tiltak for å hindra at miljøgifter som finst i sediment vert tilførde næringskjeda. Neste etappe i denne oppryddinga i "gamle synder" er tiltak for å koma forureininga i Bergen hamn til livs. Les om tiltaksplan for Bergen havn her.
Fylkesmannen i Hordaland fører elles tilsyn med produkt og avfall som inneheld prioriterte miljøgifter. Tilsynet er risikobasert. Det vil seie at vi kontrollerer der det er mest truleg med brot på regelverket, og der verknaden på miljøet er størst. Tilsynet har dei seinare åra vore retta mot polyklorerte bifenyl (PCB) i bygg; isolerglasruter og kondensatorar i lysarmatur. Vi har kontrollert korleis ei rekkje bransjar handterer kjemikaliar: bygg- og anleggsbransjen, plast- og plastbåtindustri, reinseri, bil- og billakkeringsverkstader, verft, notvaskeri m.v.